شنيك بصلصة الليمون و الحامض بالصور
على بركة الله.نبداو بتحضير الصلصة هي الاولى باش تبرد ومتقطعش لينا العجينة.
2بيضات+2 م كبار ميزينا+2 حامضات محكوكات ومعصورات+2ليمونات معصورات فقط+ك صغير سنيدة ولي بغا يزيد نص يزيدو انا كتعجبني نكهة الحامض ما كنبغيش نحلي بزاف
الكل نطحنوه فمولنكس
ونعملوه فوق البوطة على نار مهيلة حتى يعقاد ونخليوه يبرد
على فكرة هاد الصلصة لديدة و اقتصادية وممكن نعملوها فالطورطو مورانكي او كرواصة مع اضافة الشكلاط او اي معجنة.انا شخصيا كتعجبني بزاف
بالنسبة للعجين ماكاين ماحسن من ديال 10د من نهار جربتها حمقاتني
كنديرو 2 كيسان فورص كبار+2 م ك نيدو+2 م ك خميرة الخبز+2 ك كبار ما دافي+ك صغير سنيدة +ش ملح.نخلطو مزيان ونخليوها ترتاح 10د تم نزيدونص ك كبير زيت + 3 ك كبار طحين ونعجنوها مزيان كتكون مرخوفة يلا متجمعاتش نزيدو شوي الطحين.
بالنسبة لهاد العجينة ايلا كنتو غديرو بيها المملحات(بيتزا.شوصون…..)ديرو غير شوي سنيدة
انا كنخدم بيها مباشرة بلا ما نخمرها
كنسرحو العجينة و نقطعوها مستطيل مقاد وندهنوه بالصلصة لي وجدنا وبردات
تم كنلويوها و نقطعوها بالموس او الخيط دوائر ونستفوهم فاللاطة مقاربين باش يخمرو ويتلاصقو
نغطيوهم يخمرو شوي (يلا كان الصهد كنطيبهم ديك الساعة مع الصهد) وندهنوهم باصفر لبيض معنسكافي وشوي الحليب
ندهنو مزيان العجينة فالجناب
شاطت ليا لعجينة فالاول وشاطو ليا 2 شنيكات ملي عمرت اللاطة درتهم كريصات وزوقتهم باللوز افيلي.ممكن نزيدو عليهم فالعجينة جنجلان اونافع…..للتنسيم
هاهوما منين طابو مباشرة وهوما سخان ندهنوهم بالعسل او الكونفتور باش يلصق مزيان
وهاهوما بالصحة والراحة نتمنى تجربوهم ويعجبوكم
وها الكريصات لي زدنا
ايوا بالصحة والراحة مسبقا للي غادي تجربهم
