طريقة تحضير بسطيلة بالدجاج كتجي بنينة وبشكل جديد
طريقة تحضير بسطيلة بالدجاج كتجي بنينة
مقادير:
الدجاج انا تندير غير لفخد حيت رطب
- الملح ابزار
- سكنجبير
- القرفة عواد
- الزعفران
- الخرقوم
- السمن
- البصلة
- المعدنوس مقطع وربع كاس الزيت
طريقة تحضير:
نوضعو المقادير كلها فالكوكوط ونخليوها تشحر مزيان
- ونزيدو ليها كاس صغير الماء انا ايلا كنت مزروبة كندير ايلا عندي الوقت ماكنديروش كيطيب الدجاج غير فالماء ديال البصلة
- ونقفلو الكوكوط ويطيب اعلى عافية مهيلة
من بعد ماطاب كنحيد الدجاج و كنزيد العسل الحر ايلا ماعندكمش ديرو السكر
وخاليو كلشي احتا يتشحر مزيان
وكنفرتت الدجاج
- وبعد ماتعسلت البصلة مزيان
- كنرد الدجاج باش ينسجم امعا البصلة لكوكوط
- ومن بعد نصفي الخليط انديروه فالكسكاس ونخليوه احتا يطلق كاع المرقة اللي بقات باش ماتفزكش لينا الورقة
- ابا كندوزو اللوز بعدما تقشر وتقلى وقطعتو بالقطاعة ديال الربيع باش يبقا مهرمش كنزيد اعليه الزا زهر ومعلقة لعسل كيجي المداق رائع احسن من القرفة
- انا درتهم بسيطلات صغار تقدرو تديروها كبيرة
- تنديرهم فزلافة باش ايجيوني مقادين نفرش ورقة ونحط اللوز تم الحشوة ونجمعها ونقلبها ونزيد ليها ورقة اخرى من الفوق
- ملاحضة ايلا كنتو غادي تديروها كبيرة وتطيب فنفس المول كندير الخليط هو الاول عاد نزيد اللوز باش مايتحرقش ليكم
- ومن بعد ماطابت انحطها فوق الورق باش تنشف من الزيت والزبدة
ونقدمها مزينة بالعسل واللوز ولكن احتا تبرد