الكتف محمر بطريقتي
الكتف محمر بطريقتي
اللهم صل على سيدنا محمد في الاولين وصل عليه في الاخرين وصل عليه في الملا الاعلى الى يوم الدين
اخواتي وحبيباتي في الله اشخباركم وكي دوزتوا عيدكم نتمنى من الله تكونوا في احسن الاحوال
شهيوة اليوم عبارة عن لحيمة طايبة بطريقتي ان شاء الله تعجبكم
بسم الله وعلى بركة الله
المقادير
معلقة صغيرة لكل من هد التوابل
ملح ابزار سكينجبير خرقوم بلدي تحميرة كمون شوية الزعفران شعرة مسخن ومحكوك شوية السمن
معلقة كبيرة من الموطارد وتقريبا 5 ضريسات تاع التوم مطحون
واللحم بطبيعة الحال انا هنا عملت الكتف يمكن ليكم تعملوا اي حاجة طريفات اللحم عاديين او الضلعة
تنخلط جميع العطرية لي عندي ونرمل بيها اللحم مزيان ونخليه مرقد واحد الساعة تقريبا والا كانوا جايين عندك الضياف من الاحسن يترقد ليلة كاملة هكا تتهناي منو وغي تتنوضي فالصباح وتبالي بيه
تنحطوا فالكوكوت وتنرش عليه معلقة صغير قزبر حبوب تكون مطحونة من قبل واحد ضريس تاع التوم صحيح و نزيد تقريبا 3 كيسان عنبة ماء ونسد عليه فالكوكوت متنقليه مووالوووو
مرة مرة تنهز الكوكوت ونبق نحركها وهي مسدودة نرجعها فوق العافية ملي نحس بيه شرب الماء تنحل عليها لقيت اللحم طاب صافي ملقيتوش تنزيد ميهة ونسد عليه مرة اخرى
هنا اللحم طابت زولتها وحطيتها فاللاطة لي غتدخل الفرن ودهنتوا بالزبدة وشوية زعفران شعرة
نحطوا يتحمر من 2 جيهات
هنا رافقتوا مع خضيرة مبخرة وملي طابت صوطيتها فزبيدة والملحة والابزار والكمون كل حاجة بوحدها بطبيعة الحال
الشليضات لي رافقتوا بيهم