طريقة عمل كيكة الباونتي سهل و سريعة
المقادير طبقة الكيك
- 2 بيضة
- فانيليا
- رشة ملح
- معلقة كبيرة خل
تقلبيهم بمضرب يدوي .. بعدين تضيفى 3/4 كوب سكر و تكملي تقليب .. بعدين نص كوب حليب دافي و تقلبي .. بعدين ربع كوب زيت .. و آخر حاجة كوب دقيق منخول و 2 معلقة كبيرة كاكاو خام و معلقة كبيرة ” كيس بيكنج بودر ” .. هتضيفيهم تدريجي معلقة معلقة للسوايل و تقلبي كويس بالمضرب اليدوي .. و تحطيه في صنية تشيز كيك في فرن سخن حرارة متوسطة تقريبا تلت ساعة .
المقادير لطبقة جوز الهند
2 كوب حليبوكوب كريمة خفق ” لاما موجوداش ديري 3 حليب ” يسخنوا على النار و تضيفي عليهم 2 كوب جوز هند و نص كوب سميد و نص كوب سكر و رشة فانيليا و تقلبي بسرعة لحد ما تلاقيه متماسك و متجانس .. تسيبيه شوية حرارته تهدى و توزعيه على طبقة الكيك اللي بالطبع يكون بارد تماما ..
المقادير لطبقة الكريم كراميل
2 كوب حليب على النار تضيفي عليهم باكيت كريم كراميل و 3 معالق كبيرة نسكويك و حبذا لو معاهم باكيت صغير جلاكسي و تقلبي لحد ما تلاقيها بدأت تاخد قوام خفيف .. صبيها و هي سخنة بسرعة قبل ما تتماسك .. و سيبيها في التلاجة ساعتين خليها حتى لغد يكون أحسن متماسكة أكتر ..
اللي فوق صوص شيكولاتة تزين حسب رغبة.