كيكة ملفوفة بنوتيلا
كيكة ملفوفة بنوتيلا
هاد الكيكة كنت شفتها في الأنتيرنيت جربتها وجات غزالة مممممم للإشارة تقدر تتقدم في الفطور و في الكاسكروط وللضياف وقتما بغيتو تقدرو توجدها ما كتحاجش بزاف ديال الوقت بين التحضير والطياب والتقديم قل من ساعة
للمقادير
حاجتنا في 5 بيضات
غ140 سكر سنيدة
غ100طحين فورص
ملعقة كبيرة عسل
فانيليا
نوتيلا
سكركلاصي للتزيين
قسمت البيض البياض بوحدو والصفار بوحدو
طربت بالطراب الكهربائي الصفار مع غ140سكرومعلقة العسل والفانيليا مزيان خاس السكر مايبقاش يبان وتولي عندنا كريمة ثقيلة كتشبه كريمة الحلواني هههه ماعرفتش كيفاش نقولها بالعربية هي هاديك ياك ؟
وطربت البياض حتى ولى بيض بحال الثلج
زدتو على كريمة الصفار وأنا كنخلط غير بشوية من التحت للفوق منين نساجمو مع بعضياتهم زدت 100غرام ديال الطحين وأنا كنخلط بنفس الطريقة باش ما تتكونش ليا فقاعات ديال الهوا وتهبط ليا العجينة
خديت لاطة غطيتها بورق الزبدة وخويت عجين الكيك حاولت نقادو باش نحصل على شكل مستطيل
دخلتها للفران سخون على حرارة عالية 220وخليتها 10دقايق حيدتها دردرت على الوجه ديالها وهي باقة سخونة شوية سنيدة وغطيتها ببلاستيكة باش ترجع عليها السخونية وتبقى رطبة منين تبراد
قلبتها عى جهة الأخرى ودوزت على ورق الزبدة منديل فازك وحدت ورق الزبدة منتهى السهولة
رجعت قلبتها على الجهة المرشوشة بسنيدة حيدت البلاستيكة ودهنتها على العرض بنوتيلا بلا مانوصل للجوانب
لويت الكيكة
غطيتها ببلاستيكة ودخلتها للثلاجة شي نص ساعة بينما بردات نوتيلا باش تعدبنيش منين نبغي نقطعها
منين دازت نص ساعة جبدتها ورشيتها بشوية سكر كلاصي
وها الكيكة وجدات فكرة الفريز جاتني حتى لآخر لحظة باش مادكرتهومش في المقادير
وهاهي عن قرب شوفو لويات نوتيلا كيفاش غزالين نتمنى تجربوها لأنها فعلا تستحق التجربة