طريقة شهية وسريعة لعمل شاورما الدجاج بالصور
لعجين انا تندير 3 كيسان فورص وكاس فينو وم.ص سنيدة .و 2 م.ك زيت و لخميرة حسب الجو دابا البرد انكترو شوية و الملح والماء الدافئ تدلك مزيان وتكون شوية خفيفة ابحال عجينة البيتزا ونخاليوها ترتاح تقريبا ساعة تم نقسمها كويرات صغار ونخليهم يرتاحو 20 دقيقة تم نطلقوهم بالمدلك
طريقة شهية وسريعة لعمل شاورما الدجاج بالصور
من بعد ماطلقنا كورات نخليوهم يرتاحو مرة اخرى 20 دقيقة ونبداو نطيبو فيهم راه دغيا تيوجدو وماللي يطيبو نغطيوهم باش يبقاو رطبين
دابا نوجدو الصلصة غادي نحتاجو ليها قعقلة او حبة الهيل مدقوقة ومحيدين ليها لغشا وورقة سيدنا موسى والقزبر يابس مطحون وم ك مطيشة الحك وم ص عصير الحامض وم ص خل والملح وابزار ودانون طبيعي وشوية الكوزة محكوكة
اخلطو كلشي وندخلو لتلاجة احتا نوجد الدجاج
غادي نحتاجو صدر الدجاج او بيبي مقطع طويل وشوية شحمة الكلوة محكوكة وورقة سيدنا موسى والزيت العود والملح وابزار انديرو كلشي فمقلاة ونخلوهم ايطيبو
ومن بعد مايطيب الدجاج نزيدو الصلصة اللي وجدنا
ونخليو كلشي ايطيب احتا ينشف مزيان
دابا نوجدو الخس وبصلة رقيقة والحار اللي تيبغيه ولخيار المخلل
ونعمرو الخبز انديرو الحار ومايونيز انا ماتنديروش والخس والبصلة ولخيار والدجاج ونديروها فالة البانيني
وهاهو واجد بالصحة والراحة والله احسن من ديال الزنقة وماتيجيش الدجاج ناشف