انواع من الشربات الساخنة صحيين بالصور
الشربة الاولى تجمع بين الاصالة المغربية والمعاصرة الصينية خرجتها غي من دماغي وطلعات زوينة وبنينة بشهادة وليدااتي ومول داري حيت انا عندي حساسية من الكروفيت نتمنى تجربوها وتعجبكم
نبداو على بركة الله بمقادير الشربة الاولى
1خيزو منقي
1 كرعة خضراء منقية
شوية البصل
مطيشة وحيدة
شوية ليشو
شوية الربيع
لفيتة وحيدة
كروفيت منقي والقشور ديالو مصلوقين في الماء ومصفيين
شوية الشومبينيو اسود حت هو مرقد فماء الكروفيت ومقطع رقيق
معلقة كبيرة دقيق الشعير الا كان متواجد بالطبع
2 معيلقات صغار بلبولة الشعير
شوية زيت رومية ملح ابزار سكينجبير وشوية العطرية الصينينة الا كانت متوفرة مكانش نكتفي غي بالعطرية لي دكرت سابقا والا كنت تستعملوا كنور عملوا نصف وحيدة بنة الحوت انا متنستعملوش نهائيا الا كانت عندي العطرية الصينية
الطريقة
نعمل الخضر تاعي ونزيد عليهم الماء لي صلقيت فيه قشور الكروفيت ونزيد العطرية والزيت ونسد الكوكوت ونعملهم يطيبوا
ملي طابت الخضيرة خليتها حت بردات وطحنتها
زدت معلقة دقيق الشعير وطحنت كلشي
رديت كلشي فوق العافية وملي بدات الشربة تتغلي زدت الشمبنيو اسود مقطع
هنا زدت بلبولة الشعير وخليتها طيب مزياااان
من بعد زدت معلقة صغيرة طماطم مركزة وخليت حت نسامجت العناصر وطابت كلها وزدت الكروفيت غي غلى عي شوية وطفيت على الشربة
وهاهي وجدات تتجي اخواتي رائعة وصحية وخصوصا للوليدات كنضن تتعرفوا الفوائد تاع دقيق الشعير والبلولة للكريات الحمراء والبيضاء لي عندنا فالجسم
دبا ندوزا للشربة التانية ساهلة وخفيفة وعندي معتامدة من شحال هدي
المقادير
نحتاجو لبطاطس منقية انا هنا عملت غي زوج
بصيلة صغيرة الا كان عندكم البورو كان احسن حت هو تيعطيها مداق زوين بزززاف
ملح ابزار طرف الزبدة
الطريقة
تنعمل الماء الكافي ونسد على الكوكوت باش كلشي يطيب
ملي طيب وتبرد نطحونوا العناصر كلها
نزيد 2 معالق كيار من القشدة الطرية ونرد الكل غي يطيب شوية حت نحس بيها غي شوية عقادت
ونقدمهم بالصحة والراحة